TUGUEGARAO CITY, Cagayan, Philippines - Pinabulagta ang beteranong municipal councilor na sinasabing nasa huling termino na nito matapos pagbabarilin ng mga hindi kilalang lalaki sa loob ng kanyang resthouse sa Barangay Zamora, bayan ng Cabarroguis, Quirino noong Martes ng gabi.
Sa inisyal na police report, tadtad ng bala ang katawan ni Councilor Alberto Tinglayan na nag-iisa lamang sa nasabing lugar nang pasukin ng gunmen.
Nabatid na nasa Barangay Banasan ang pamilya ng biktima nang maganap ang pamamaril. Narekober sa crime scene ang mga basyo ng bala ng cal.45 pistol.
Nabatid na nasa ikatlong termino na ang biktima na sinasabing may balak lumahok sa mayoralty race o kaya vice mayor sa susunod na eleksiyon.
Inaalam pa rin ng pulisya kung may kaugnayan din sa negosyo ng biktima na furniture making at pagmimina ang isa motibo sa pamamaslang.