BULACAN, Philippines – Kalaboso ang 41-anyos na fish vendor na nagpakilalang pekeng pulis matapos itong arestuhin ng mga operatiba ng pulisya sa Barangay Bayugo, Meycauayan City sa Bulacan kahapon ng madaling araw.
Nakatakdang kasuhan ang suspek na si Joseph Camarillo, fish vendor at nakatira sa Barangay Iba sa nasabing bayan.
Base sa police report na nakarating kay P/Supt. Lailene Amparo, nagreklamo ang ilang residente sa Northville 3 laban sa suspek ang nagpapanggap na pulis at nangingikil sa mga drug suspek.
Kaagad namang rumesponde ang mga pulis kung saan sinita ang suspek na naglalakad.
Gayunman, nagpakilala ang suspek na bagong hepe ang intel operatives ng pulisya kung saan nagpakita pa ito ng PNP identification card.
Subalit, lumabas sa beripikasyon ng pulisya, peke ang PNP I.D. ng suspek kaya binitbit ito patuingong himpilan ng pulisya.