TUGUEGARAO CITY, Cagayan, Philippines - Sa kalaboso na dadatnan ng bagong taon ng isang 37-anyos na public high school teacher matapos mahuli sa isang drug buy operation sa Barangay Annafunan West ng lungsod na ito kamakalawa. Kinilala ni Supt. Jessie Tamayao, hepe ng PNP Tuguegarao City ang naaresto na si John Roger Pasion, 37, ng Barangay Linao National High School. Ayon kay Tamayao, tatlong sachets ng shabu ang nakuha sa guro matapos mahulog sa entrapment sa Aquino street dakong alas-1:30 ng madaling araw. Ang pagkadarakip kay Pasion ay bunga ng matagal nang pagmamanman sa kanya ng pulisya, dagdag ni Tamayao.