CAMARINES NORTE, Philippines –- Kapwa bumulagta sa kalsada ang 23-anyos na opisyal ng pulisya at dating sundalo ng Philippine Army matapos na magkabarilan sa isinagawang anti-drug surveillance sa harapan ng Villa Concepcion Subd. sa Barangay Ibingay, Masbate City sa Masbate noong Sabado ng gabi.
Kinilala ang dalawa na sina P/Insp. Benjie “Bon” Calixto, PNPA graduate batch 2013, miyembro ng Masbate Provincial Public Safety Company, Intelligence Operatives at nakatira sa Barangay Espinosa, Masbate City; at Cesar Punzalan Jr., 36, ng Barangay Pianmarbuhan sa bayan ng Mobo, Masbate.
Sa ulat na nakarating sa Camp Simeon Ola sa Legaspi City, kasalukuyang may minamanmanan na drug personality sina Calixto at PO1 Roy Balonzo nang mapadaan si Punzalan Jr. at kasama nitong lalaki.
Gayunman, sinita nina Calixto at PO1 Balonzo ang dalawa na humantong sa mainitang pagtatalo na nauwi sa barilan.
Bago nalagutan ng hininga si Calixto, nagawa pang gumanti ng putok at tinamaan sa likuran si Punzalan Jr. kung saan gumanti na rin ng putok si PO1 Balonzo nang makitang tinamaan ang kanyang lider.
Narekober sa crime scene ang cal. 9mm pistol na may 14 bala; isang sub-machine gun (ingram), cal. 9mm pistol na may 24 bala at 7-basyo ng baril.