TUGUEGARAO CITY, Cagayan, Philippines – Kritikal ang 63-anyos na lolo matapos nitong saluhin ang saksak ng kaaway para sa kanyang bayaw na nagdaraos ng birthday party sa Barangay Mabini, bayan ng Alicia, Isabela kamakalawa. Kinilala ni P/Chief Insp. Santos Tecbobolan, hepe ng Alicia PNP ang biktima na si Jaime Tanap habang pinaghahanap naman ang suspek na si Piolo Dassig. Lumalabas sa imbestigasyon na kasama ang lolo sa inumang idinaos sa kaarawan ng kanyang bayaw na si Cris Mostoles nang magsuntukan sina Dassig at Mostoles na kapwa lango dahil sa agawan sa pulutan. ?Ayon sa pulisya, pumagitna ang biktimang lolo habang inuundayan ni Dassig ng saksak ang kanyang bayaw kaya ito ang nasaksak.