CAVITE, Philippines - Isang tama ng bala sa ulo ang tumapos sa buhay ng isang misis nang pasukin at barilin ng ‘di kilalang salarin sa loob mismo ng kanyang tahanan kamakalawa ng gabi sa Brgy. Bulihan, Silang, Cavite.
Patay na nang matagpuan ang biktima na si Sarah Jocelyn Jalandani Massey, nasa hustong gulang, may asawa ng Blk 7, Lot 35, Geines Ville, Brgy Bulihan ng nasabing bayan.
Sa imbestigasyon ni PO3 Decto Abangoen, alas-7:29 ng gabi nang matagpuan ng kanyang kapitbahay ang duguang katawan ng biktima habang nakaupo sa isang sofa at may tama ng bala sa ulo.
Nadiskubre lamang ang krimen nang puntahan ang biktima ng kapit bahay na si Gng. Amelita Barrientos para mag-deliver sana ng puto cake. Nakailang beses na umanong kumakatok sa pinto si Barrientos subalit walang nagbubukas kung kaya sumilip umano siya sa bintana at dito niya nakita ang duguang biktima na nakaupo sa sala.