MANILA, Philippines – Patay ang isang nagbabakasyong miyembro ng Philippine Air Force (PAF) matapos na tambangan at pagbabarilin ng mga hinihinalang miyembro ng Abu Sayyaf Group (ASG) sa likod ng isang simbahan sa Brgy. San Raymundo, Jolo, Sulu kamakalawa.
Kinilala ang biktima na si Air Force enlisted personnel Andrew Burias Nono, 27, nakatalaga sa 15th Strike Wing na nakabase sa Sangley, Cavite. Nagawa pang maisugod sa Sulu Provincial Hospital si Nono pero idineklarang dead-on-arrival sanhi ng mga tama ng bala sa katawan.
Ayon kay Brig. Gen Alan Arrojado, commander ng AFP Joint Task Group Sulu, dakong alas-5 ng hapon nang maganap ang insidente sa likod ng Jolo Church sa Brgy. San Raymundo.
Habang nakatayo sa likod ng simbahan ang biktima nang biglang sumulpot ang mga armadong salarin at sunud-sunod siyang pinaputukan ng baril.
Kakauwi lamang ng biktima sa Sulu matapos na humingi ng bakasyon sa kanyang opisyal nang mangyari ang insidente.