MANILA, Philippines - Nasa kritikal na kondisyon ang regional director ng Department of Interior and Local Government (DILG) matapos itong pagbabarilin ng hindi pa kilalang lalaki sa Barangay Parian, Calamba City, Laguna kahapon ng umaga.
Kinilala ang biktima na si DILG Region IV-A Director Renato Brion ng Unit 705 Tower 3, Avida Tower, New Manila sa Quezon City.
Ayon kay P/Supt. Fernando Ortega, hepe ng Calamba PNP, kararating lamang ni Brion lulan ng Toyota Innova (SLC 963) na minaneho ng driver na si Medel Saturno kasama ang kaniyang misis para pumasok sa opisina sa Andison Building 1 nang lapitan at pagbabarilin ng gunman bandang alas-7:30 ng umaga.
Kaagad na isinugod sa Calamba Medical Center Hospital kung saan nasa malubha itong kalagayan.
Kaugnay nito, ipinag-utos na ni Interior and Local Government Secretary Mel Senen Sarmiento sa PNP ang malawakang manhunt operation laban sa gunman.