BULACAN, Philippines – Napatay ang 37-anyos na inhinyero habang kritikal naman ang kasama nito makaraang tambangan ng mga di-kilalang kalalakihan na lulan ng tatlong motorsiklo sa kahabaan ng highway sa Barangay Bagbaguin, bayan ng Santa Maria, Bulacan kahapon.
Namatay habang ginagamot sa Rogasciano M. Mercado Memorial Hospital ang biktimang si Jezyriel Beturin habang patuloy na ginagamot ang negosyanteng si Niño San Gabriel na kapwa nakatira sa Barangay Santa Clara sa nasabing bayan.
Sa imbestigasyon ni PO3 Jonathan Mañacap, lumilitaw na patungong Bocaue sina Berutin at San Gabriel lulan ng Toyota SUV (NSG 55) nang pagbabarilin ng mga di-kilalang kalalakihang lulan ng tatlong motorsiklo.
Bumangga ang SUV ng mga biktima sa kasalubong na truck kung saan kaagad ding tumakas ang gunmen.
Narekober sa crime scene ang sampung basyo ng bala ng baril habang patuloy naman ang imbestigasyon.