CAMP SIMEON OLA, Legazpi City, Philippines – Isang 47-anyos na mister at 13-anyos na binatilyo ang nasawi matapos na sila ay tamaan ng kidlat habang nagpapastol ng kalabaw kamakalawa ng hapon sa Sitio Talisay, Barangay Panbuhan, Garchitorena,Camarines Sur. Namatay noon ang mga biktima na kinilalang sina Alex Lastrilla,47, may asawa, at Jobert Iglesias,13, kapwa magsasaka sa naturang lugar. Batay sa ulat, dakong alas-4:00 ng hapon ay abala ang dalawang biktima sa pagpapastol ng kanilang mga alagang kalabaw nang bigla na lamang kumulog at kasunod noon ay pagkidlat na direktang tumama sa mga biktima na naging sanhi kanilang kamatayan. Ipinayo ng mga otoridad sa mga magsasaka na sakaling abutan ng kidlat sa gitna ng bukid ay kaagad na alisin ang mga anumang gamit sa katawan na kumikislap tulad ng silver dahil sa ito ay hinahabol ng kidlat, kaagad din na umalis sa bukid at huwag sumilong sa puno o bahay kubo sa gitna ng bukid dahil sa umanoy ito ang kadalasan na tina-target ng kidlat.