BULACAN, Philippines - Bagsak kalaboso ang isang lalaking nagpakilalang miyembro ng PNP matapos na masita ito ng tunay na pulis habang nag-aabang ng masasakyan sa Brgy. Wakas, Bocaue, Bulacan kahapon.
Ang suspek na si Romel Narciso, 22 ng Guiguinto, Bulacan na nagpakilalang kasapi ng Criminal Investigation and Detection Group (CIDG) na nakabase sa Camp Crame ay nasamsaman pa ng pekeng ID at cal. 45 pistol.
Base sa ulat ni P/Supt. Nathaniel Villegas dakong alas-6:30 ng umaga, kasalukuyang nangangasiwa ang pulisya sa daloy ng trapiko sa bahagi ng MacArthur Highway sa Brgy. Wakas nang mapansin ang suspek na nakasuot ng PNP bull cap, jacket na may insignia ng pulisya at nang kapkapan ay may nakabukol na baril sa kanyang baywang.
Ipinakita naman ng suspek ang ID ng CIDG nang sitahin ito pero ng iberipika sa pamunuan ay natuklasang peke kaya inaresto ang suspek.