BULACAN, Philippines – Brutal na kamatayan ang sinapit ng mag-iina na sinasabing pinahirapan at pinagbabaril saka ibinaon sa gitna ng palayan matapos na dukutin ng mga di-kilalang lalaki noong nakalipas na linggo ng gabi sa Barangay San Antonio, bayan ng Mexico, Pampanga.
Personal na kinilala ni Chairman Rodolfo Villena ng Barangay Parian ang mga biktimang sina Pacita Villena Limpin, 59; Patrick Limpin, 30; at si Christian Paul Limpin, 25, mga nakatira sa nasabing barangay.
Sa police report na nakarating sa Camp Olivas, Pampanga, nakatanggap ng text message si Chairman Villena mula sa hindi nagpakilalang residente na matatagpuan ang mga bangkay ng mag-iina sa gitna ng palayan sa Brgy. San Antonio.
Kaagad namang rumesponde ang pulisya kung saan natagpuan ang pinaglibingan sa mga biktima na nakatali pa ang mga paa at kamay na may mga tama ng bala sa iba’t ibang bahagi ng katawan.
Nabatid na nawawala ang mga biktima noong Biyernes (Enero 16) na sinasabing dinukot ng mga di-kilalang kalalakihan.
Base sa record ng pulisya, si Christian Paul ay sinasabing isa sa mga suspek sa kasong extortion at nagpakilala pa itong miyembro ng Rebolusyunaryong Hukbong Bayan habang patuloy naman ang imbestigasyon.