CAVITE, Philippines – Isang di pa nakikilalang katawan ng babae ang natagpuang palutang lutang sa tubig dagat sa Brgy. 49, San Antonio, Cavite City, kamakalawa ng hapon.
Hanggang sa kasalukuyan ay hindi pa nakikilala ang biktima na nakita ng dalawang mangingisda habang ang mga ito ay nasa dagat at nangingisda.
Palutang lutang umano ang katawan ng biktima malapit sa fish cages ng nasabing dagat. Sa pagsisiyasat ng pulisya, wala umano silang nakikitang anumang sugat sa biktima kung kaya malaki ang paniniwala ng mga ito na galing sa dagat ng Maynila ang biktima at tinangay lamang ng malakas na alon patungo sa Cavite.
Nananawagan ang pulisya sa sinumang nawawalan ng kanilang kaanak na magtungo sa kanilang himpilan upang kilalanin ang biktima.