BULACAN, Philippines – Napatay ang 57-anyos na lalaking kilala ng mga pulitiko sa bayan ng Norzagaray matapos itong tambangan sa mga di-kilalang kalalakihan sa liblib na bahagi ng Sitio Cogonan, Barangay Sibul sa bayan ng San Miguel, Bulacan kamakalawa umaga. Limang tama ng bala ng M-16 Armalite rifle ang tumapos sa buhay ni Ireneo Santiago ng Barangay Kalawakan sa bayan ng Doña Remedios Trinidad habang isa sa gunmen ay nakilalang si Alyas Nally. Sa imbestigasyon ni PO2 Richard Butic, nagmomotorsiklo ang biktima nang harangin at ratratin ng grupo ni Nally pagsapit sa nasabing lugar. Narekober sa crime scene ang limang basyo ng bala ng M-16 Armalite rifle habang patuloy na tinutugis ang grupo ni alyas Nally.