MANILA, Philippines - Isa na namang brodkaster ang napaslang matapos pagbabarilin ng riding-in-tandem assassins sa harapan ng gasoline station sa kahabaan ng highway sa bayan ng Kabasalan, Zamboanga Sibugay noong kahapon ng umaga.
Sa ulat ni P/Chief Insp. Ariel Huesca, PRO-9 spokesman, idineklarang patay sa Kabasalan Hospital sa tinamong tatlong tama ng bala sa dibdib ng biktimang si Mario Baylosis, 33.
Si Baylosis ay brodkaster sa Radio Natin na nakabase sa nasabing lalawigan at nakatira sa Barangay Goodyear sa nabanggit na bayan.
Naganap ang panaÂnambang sa harapan ng Phoenix Gasoline Station sa Barangay Salipsayin bandang alas-11: 25 ng umaga.
Sa inisyal na pagsisiyasat nina P/Insp. Rustom Romina at P/Senior Insp. Rico Pondol, lulan ng pulang motorsiklo ang biktimang papauwi mula sa programa nito sa radyo nang sundan ng tandem.
Pagtapat sa biktima ay agad itong pinagbabaril kung saan tumakas matapos na tumilapon sa motorsiklo ang duguang biktima.
Narekober sa crime scene ang mga basyo ng bala ng cal. 45 pistol habang patuloy naman ang imbestigasyon.