Meralco binuhay ang pag-asa
MANILA, Philippines — Kinuryente ng Meralco ang Phoenix, 82-76, upang buhayin ang pag-asa nito sa playoffs ng 2024 PBA Philippine Cup kahapon sa Smart Araneta Coliseum.
Humakot ng kumpletong 18 points, 4 rebounds at 4 assists sahog pa ang tig-isang steal at tapal si Aaron Black upang banderahan ang krusyal na panalo ng Bolts mula sa dalawang sunod na kabiguan.
Angat ngayon ang Meralco sa 4-5 upang pansamantalang maagaw ang ika-walong puwesto mula sa NorthPort na may 4-6 kartada.
Nagawa ito ng nga bataan ni coach Luigi Trillo sa tulong ng 15, 14 at 13 points nina Chris Newsome, Chris Banchero at Allein Maliksi, ayon sa pagkakasunod, habang may tig-anim na marka sina Cliff Hodge at Anjo Caram.
Sahog sa kampanya ni Hodge ang 13 rebounds, tatlong assists, tatlong blocks at isang steal.
Subalit hindi ito naging madali nang muntik malustay ng Bolts ang komportableng 75-64 abante sa huling apat na minuto matapos ang lay-up ni Hodge.
Nagpakawala ng 13-4 bomba ang Fuel Masters sa lay-up ni Javee Mocon upang makalapit sa 74-77 sa huling 42 segundo sa orasan bago selyuhan nina Banchero at Bong Quinto ang tagumpay para sa Bolts.
Nagkasya lamang sa limang puntos ang ace player na si Jason Perkins at tanging sina Ken Tuffin at Kent Salado na may 14 at 12 points, ayon sa pagkakasunod, ang nakapagpasiklab para sa Fuel Masters na lumagapak sa 3-7 kartada.
Samantala, haharapin ng Barangay Ginebra ang sibak nang Converge ngayong alas-6:15 ng gabi sa Aquilino Pimentel, Jr. International Convention Center sa Cagayan De Oro City.
- Latest
