Top 1 ‘most wanted’ ng CamSur, nalambat sa Cavite
CAVITE, Philippines — Bumagsak na sa kamay ng mga awtoridad ang tinaguriang Top 1 “most wanted person (MWP) sa Camarines Sur matapos ang ikinasang operasyon sa Silang, Cavite noong Biyernes ng madaling araw.
Kinilala ang suspek na si Michael Anthony Pantela Sarmient alias “Michael Pantela Sarmiento”, binata, factory worker, tubong Camarines Sur at residente ng Tibayan compound Aguinaldo Highway, Barangay Biga 2, Silang, Cavite.
Sa ulat ng pulisya, alas-4 ng madaling araw nang magkasa ng operasyon kontra MWPs ang pinagsanib na puwersa ng Silang at Caramoan Municipal Police, Regional Intel Unit-4A PIT Cavite sa Brgy. Biga 2, Silang na nagresulta sa pagkakaaresto ni Sarmiento.
Bitbit ng mga awtoridad ang warrant of arrest laban kay Sarmiento na insiyu ni Judge Ma. Angela Companado-Arroyo ng Camarines Sur Regional Trial Court dahil sa kasong acts of lasciviousness.
Si Sarmiento ay tinaguriang Top MWP, Municipal Level ng Caramoan Municipal Police.
Halagang P180,000 ang inirekomendang piyansa para sa pansamantalang paglaya ng akusado na kasalukuyang nasa kustodiya na ng Caramoan Police.
- Latest