Misis pumagitna sa away, kinatay!
AROROY, Masbate, Philippines — Karumal-dumal na kamatayan ang sinapit ng isang misis matapos na pagtatagain ng lalaking kaaway ng kanyang nakatatandang kapatid sa Purok Baybay, Brgy. Puro sa bayan ng Aroroy ng lalawigang ito kamakalawa ng gabi.
Dead-on-the spot dahil sa malalalim na taga sa iba’t ibang bahagi ng katawan ang biktimang si Reyna Daliva Tugbo, residente ng naturang barangay habang nakaligtas sa pananaga ang kanyang ate na si Lorena, 42-anyos, dalaga.
Tinutugis na ng mga pulis ang tumakas na suspek na si Ariel “Bigit” Gutlay, isang gold panner.
Sa ulat, dakong alas-7:30 ng gabi, nakita ni Reyna ang kanyang ate na si Lorena na nakikipagtalo sa lasing na lasing na suspek.
Pumagitna umano si Reyna para umawat sa pagtatalo at pilit pinapayapa nito ang suspek pero siya naman ang napagbalingan ng matinding galit ng huli. Bumunot ng itak ang suspek at walang habas na pinagtataga ang biktima na duguang humandusay.
Narekober ng mga pulis sa lugar ang mahabang itak na ginamit ng suspek sa pamamaslang.
- Latest