Fish vendor niratrat ng tandem, utas
TALAVERA, Nueva Ecija, Philippines — Patay ang isang tindero ng isda habang nakaligtas sa kapahamakan ang pinsan nito makaraang pagbabarilin ng dalawang nakamotorsiklong lalaki sa Purok 1, Barangay Sibul, dito, kamakalawa ng umaga.
Kinilala ng pulisya ang napaslang na biktima na si Junie Malvar, nasa hustong gulang, may-asawa ng Barangay Paco Roman, Rizal, Nueva Ecija.
Nabatid sa ulat na alas-6:20 ng umaga, sakay ng kulay itim na motorsiklong Honda (walang plaka) ang biktima at pinsan nitong si Alfredo Graneta at patungo sa pamilihang bayan nang walang kaalam-alam na sinusundan na pala sila ng dalawang suspek na sakay ng kulay abuhin na motorsiklo.
Hindi nagtagal ay umoberteyk ang mga suspek at sa puntong iyon ay pinagbabaril na ang biktima na nagresulta ng agarang kamatayan nito.
Bumuwelta naman ang mga suspek patakas sa direksyong timog o patungo sa lungsod ng Cabanatuan City.
Ayon sa nakaligtas na si Graneta, wala umano siyang nalalaman na nakagalit ng kanyang pinsan upang itumba ito ng mga salarin.
- Latest
