LP solon, suportado si Mayor Sara
MANILA, Philippines — Nagpahayag ng suporta si Liberal Party Cavite First District Rep. Francis Gerald “Boy Blue” Aguinaldo Abaya sa posibleng presidential bid ni Davao City Mayor Sara Duterte-Carpio sa 2022.
“Walang opo-oposisyon sa mag-amang Duterte, maging ang Pangulo o si Mayor Sara. Kapag kailangan mo ng tulong, naroon sila. Dahil sa malasakit na ‘yan, buong puso kong inaalay ang suporta ko sa kandidatura ni Mayor Sara para sa pagka-presidente sa 2022,” ani Abaya.
Sa kabila ng pagsuporta sa kandidatura ni Sara, nananatili pa rin si Abaya bilang opisyal ng LP.
Nagpasalamat si Abaya kina Pangulong Rodrigo Duterte at Mayor Sara sa patuloy na pagkakaloob ng mga proyekto sa kanilang distrito, kabilang ang ayuda, medical assistance, burial assistance mula sa Department of Social Welfare and Development (DWSD), at iba pa.
Nagpasalamat rin si Abaya kay Pangulong Duterte sa pagkakaloob ng tulong at suporta sa kanyang adhikaing i-upgrade ang Kawit Kalayaan Hospital sa Level 2 District Hospital sa ilalim ng House Bill (HB) No. 7123 na kanyang inihain noong nakalipas na Hulyo 20 at noong 18th Congress.
- Latest
