Phoenix sasandal kay Harris

MANILA, Philippines — Sasandalan ng Phoenix ang championship ex­perience ni balik-import Paul Harris para sa kanilang kampanya sa 2021 PBA Governors’ Cup na didribol bukas sa Ynares Sports Arena sa Pasig City.

Iginiya ni Harris ang Talk ‘N Text Tropang Texters (ngayon ay TNT Tropang Giga) sa korona ng Commissioners’ Cup noong 2011 bago nahugot ng Ginebra Gin Kings noong 2016.

Nagkaroon si Harris ng hyperextended right thumb at pinalitan ni Justin Brownlee patungo sa paghahari ng Gin Kings sa torneo.

“No brainer for us that when Paul was available and he wants to go here. Ang dami niyang pinalampas na opportunities just to be here because he has friends here which he considers as families,” ani Fuel Masters coach Topex Robinson.

“Alam na niya kung ano iyong pupuntahan niya dito. So that’s a big factor for us,” dagdag pa nito sa 35-an-yos na reinforcement.

Ito ang unang torneo kung saan hahawak si Robinson ng import.

Makakasama ni Harris sa Fuel Masters sina Matthew Wright, Jason Perkins, Justin Chua at RJ Jazul at mga bagong hugot na sina Sean Anthony, Sean Manganti, Chris Banchero, Jake Pascual at Simon Camacho.

Dinala ng Phoenix sina Vic Manuel at Michael Cali­saan sa NorthPort para makuha sina Anthony at Manganti at isang 2021 second round draft pick.

Sasalang ang Fuel Masters sa aksyon sa Huwebes katapat ang Terrafirma Dyip.