TNT uli sa game 2
MANILA, Philippines — Ipinagpatuloy ng TNT Tropang Giga ang kanilang pagdomina sa Magnolia matapos angkinin ang 105-93 panalo sa Game Two ng 2021 PBA Philippine Cup Finals kahapon sa Don Honorio Ventura State University Gym sa Bacolor, Pampanga.
Kumamada si rookie guard Mikey Williams ng 28 points, 9 rebounds at 6 assists para sa 2-0 lead ng Tropang Giga sa kanilang best-of-seven championship series ng Hotshots.
“Execution and selflessness, the willingness of our players to make the extra passes and find the open guy,” wika ni coach Chot Reyes. “We’re still going to need to depend and rely on our defense to win the game.”
Umiskor si Jayson Castro ng 16 markers para sa TNT habang may 12, 11 at 10 markers sina Troy Rosario, Brian Heruela at Ryan Reyes, ayon sa pagkakasunod.
Kagaya sa kanilang 88-70 panalo sa Game One ay maaga ring nagtayo ng double-digit lead ang Tropang Giga nang kunin ang 22-10 bentahe sa first period patungo sa 57-36 pag-iwan sa Hotshots sa second quarter.
Nagsalpak ang TNT ng 13 triples sa first half tampok ang tig-tatlo nina Williams at Heruela at dalawa ni Reyes kumpara sa limang tres ng Magnolia.
Ngunit nakabangon ang Hotshots sa third period mula sa iniskor na 12 points ni Ian Sangalang para makadikit sa 79-86 sa Tropang Giga sa pagtiklop ng naturang quarter.
Huling nagbanta ang Magnolia sa 86-90 sa 7:41 minuto ng final canto bago muling nakalayo ang TNT sa 102-89 sa inihulog na 12-3 bomba sa huling 1:54 minuto nito.
Kumolekta si Sangalang ng 25 points, 8 boards at 2 assists para banderahan ang Hotshots.
- Latest
