Hidilyn at Julius engaged na!
MANILA, Philippines — Dumating na ang pagkakataong pinakahihintay ni Tokyo Olympics gold medalist Hidilyn Diaz.
Sa kanyang Instagram post ay ipinagsigawan kahapon ni Diaz ang kanilang engagement ng nobyong si strength and conditioning coach Julius Naranjo.
“It’s YES!” wika ni Diaz sa pagsagot n’ya kay Naranjo. “It was a magical moment with @imjulius. I’m grateful to God that He sent Julius into my life, he make my life easy.”
Nagkakilala ang parehong 30-anyos na sina Diaz at Naranjo noong 2017 sa Asian Indoors Martial Arts Games sa Ashgabat, Turkmenistan kung saan kinatawan ni Diaz ang Pilipinas at dala naman ni Naranjo ang bandera ng Guam.
Noong Hulyo sa Tokyo, Japan ay tinapos ni Diaz ang 97-taong pagkauhaw ng Pinas sa kauna-unahang Olympic gold medal.
Sina Naranjo at Chinese coach Gao Kaiwen ang gumabay sa tubong Zamboanga City sa pagrereyna sa women’s 55 kilogram division ng Tokyo Games.
“Alam ng iba kung ano mga sinasakripisyo niya para maabot namin ang pangarap na ginto sa Olympics together with #TeamHD, nun laro kinilig at masaya ako kasi siya mismo nagsabi God is the center of our relationship, kaya walang duda magYeYES ako dahil swerte ako may isang Julius nagmamahal, nagintindi, at sumuporta sakin,” ani Diaz kay Naranjo na ipinanganak sa Guam.
Ang ama ni Naranjo ay isang Pinoy habang ang nanay niya ay Haponesa.
Magsasanay si Diaz sa Malaca, Malaysia kasama si Naranjo bilang paghahanda sa 2021 International Weightlifting Federation (IWF) World Championships na nakatakda sa Disyembre 7-17 sa Tashkent, Uzbekistan.
- Latest