Higit P40 milyong shabu nasabat sa Makati: 2 arestado
MANILA, Philippines — Mahigit sa P40-milyong halaga ng shabu ang nasabat sa isinagawang buy-bust operation sa Makati City, kamakalawa ng gabi.
Kaugnay nito dalawa ang nadakip sa isinagawang operasyon na kinilalang sina Bryan Salceda, 26, construction worker at Jerome Gaje, 27, kapwa ng Pasay City.
Sa inisyal na ulat ng Philippine National Police-Drug Enforcement Group, dakong alas-7:30 ng gabi nang maaresto ang mga suspek sa B. Hilario St., Brgy. Palanan, Makati City.
Nabatid na nakabili ang mga awtoridad ng nasa 6 na kilo ng shabu na nagkakahalaga ng P40,800,000.
Samantala, nasa P14 milyong halaga ng shabu ang nasabat din sa dalawang hiwalay na operasyon sa Makati at Parañaque City, nitong nakalipas na Martes.
Una ang pagkahuli sa isang Aldren Cabarrubias, 21, na nakumpiskahan ng 2000 gramo ng shabu na nagkakahalaga ng mahigit sa P13 milyon sa isinagawang buy-bust operation, dakong alas 5:37 sa Evangelista corner Arnaiz sts,, Brgy. Bangkal, Makati City.
Kasunod nito, dakong alas-8:55 ng gabi ng Martes din, ay nadakip naman sa Kabesang Cillo St, Brgy. Tambo, Parañaque City ang dalawang suspek na kinilalang sina Kennedy Balan, 25; at Maynard Delos Santos , 28-anyos.
Narekober mula kay Balan at Delos Santos ang nasa 50 gramo ng shabu na nagkakahalaga ng P340,000 at buy-bust money. — Doris Franche
- Latest