Magulang pananagutin sa mga pasaway na mga anak - PNP
MANILA, Philippines — Responsibilidad ng mga magulang ang kanilang mga pasaway na anak na masusumpungang lumalabag sa ipinatutupad na mga health protocols laban sa COVID-19.
Ito ang binigyang diin ni Philippine National Police (PNP) chief Gen. Guillermo Eleazar nang makatanggap ng mga report na maraming bata na ang nasa pasyalan, malls at lansangan matapos na ibaba ang alert level status sa level 3 sa National Capital Region (NCR).
Ayon kay Eleazar, ipapatawag nila ang mga ito at wawarningan kaya dapat na siguraduhin ng mga magulang ang kaligtasan ng kanilang mga anak na naglalaro at gumagala sa mga lansangan.
Hindi rin umano dapat na sinasama sa pamamasyal ang mga anak dahil nananatili ang banta ng virus kung saan posibleng mahawaan ang mga menor de edad.
Kapansin-pansin din ang hindi pagsusuot ng face mask at face shield na proteksiyon habang nasa labas ng bahay.
“Parents could be held liable for their children’s disregard or disobedience of health safety protocols,” ani Eleazar.
Batay sa Metro Manila Council Resolution No. 21-24, pinapayagan lamang na makalabas ang mga menor de edad kung kasama ang kanilang mga magulang.
Kahapon muling nagsimula ang pagbabakuna sa mga kabataang nasa edad 12 hanggang 17 na may comorbidity.
- Latest
