15K pulis ikakalat sa Marcos inauguration

MANILA, Philippines — Mas nadagdagan pa ang bilang ng mga pulis na itatalaga at ikakalat ng Philippine National Police (PNP) para sa inagurasyon ni President elect Ferdinand ‘Bongbong’ Marcos sa Huwebes sa National Museum.

Mula sa dating 7,000 pulis, sinabi ni PNP spokesperson Police Col. Jean Fajardo na aabot na sa 15,000 pulis ang ipakakalat  sa paligid ng National Museum, Philippine International Convention Center, Mendiola areas at mga checkpoints.

“Kung lahat-lahat including ’yung mga ila­lagay natin na mga checkpoints sa mga papasok sa Metro Manila ay higit kumulang na 12,000 hanggang 15,000 ang total na PNP personnel na ide-deploy natin for this purpose,” ani Fajardo.

Tiniyak naman ni Fajardo na wala pa silang natatanggap na pagbabanta o anumang impormasyon upang idiskaril ang inagurasyon ni BBM.

Gayunman, patuloy ang kanilang koordinasyon sa Armed Foces of the Philippines, Philippine Coast Guard at Manila LGU upang matiyak na ang lahat ng impormasyon ay sumasailalim sa validation.

Sa pagtaya ng PNP, 25,000 hanggang 30,000 tagasuporta ni Marcos ang magtitipon sa paligid ng National Museum.

Nilinaw ni Fajardo na papayagan ang mga raliyista na magsagawa ng protesta subalit ito ay sa freedom parks lamang at hindi malapit sa National Museum.

“Sila naman po ay papayagan basta ‘yan po ay limited sa freedom parks at sana ay huwag na sila magplano na umalis, magmartsa patungo sa area kung saan gaganapin ‘yung inauguration para hindi na rin magkaroon ng kaguluhan at problema,” dagdag pa ni Fajardo.