Omicron wala pa sa Pinas - DOH
MANILA, Philippines — Wala pang indikasyon na nakapasok na sa Pilipinas ang Omicron variant, ayon sa Department of Health (DOH) nitong Sabado.
Sa isang public briefing, sinabi ni Health Undersecretary Maria Rosario Vergeire na wala pa namang lugar sa bansa na nakararanas ng biglaang pagtaas ng mga bagong COVID-19 cases, na maaring masabing may kaso na ng nasabing variant.
“If you see in the other countries, nagpuputukan ‘yung mga kaso nila, biglang tumataas ’yung numero. Dito naman po sa ating bansa ay hindi pa natin nakikita. So sa tingin ko po sa ngayon hindi pa ho nakakapasok ang variant na ito sa atin,” ani Vergerei.
Patuloy lang aniya ang monitoring sa 253 indibiduwal na nagmula sa South Africa, at sa tatlo pang pasahero na nanggaling sa tatlong African countries na nakapasok sa bansa bago pa mailagay sa red list ng Pilipinas.
Pinawi rin ni Vergeire ang pangamba ng publiko sa pagsasabing hindi pa kailangang mag-panic at sa halip ay sumunod sa health protocols.
“Yes, this variant has a lot of mutations na kailangan po cautious tayo,” aniya pa.
Ayon naman kay PGC Executive Director Cynthia Saloma, sa ngayon ay wala pang nakikitang Omicron mula sa 18,000 samples pero patuloy pa rin nilang isinasailalim sa pagsusuri ang mga sample ng Nobyembre.
Ipinaliwanag ni Saloma na hindi nawawala ang posibilidad na may Omicron variant na sa bansa pero hangga’t wala silang nakikita sa pagsusuri ay hindi ito maaaring makumpirma.
Umaasa ang DOH na patuloy sa pagbagsak ang bilang ng bagong COVID-19 cases sa bansa hanggang sa katapusan ng buwang ito.
Noong Biyernes, nakapagtala lang ng 544 bagong kaso ng COVID-19 infections, ang ikatlong pinakamababa ngayong taon.
Sa kabila naman ng naging pahayag DILG na maari nang magdaos ng Chistmas party subalit sa limitadong kapasidad na pinapayagan sa ilalim ng COVID-19 Alert Level 2, payo ni Vergeire na gawin lang muna ang virtual parties matapos maiulat na 13 ang nahawaan ng Omicron variant matapos dumalo sa party sa Norway. — Malou Escudero
- Latest
