Border higpitan, quarantine pahabain vs Omicron - OCTA
MANILA, Philippines — Hinikayat ng OCTA Research Team ang pamahalaan na ipatupad ang matinding paghihigpit sa mga border ng Pilipinas at pagpapatupad ng mas mahabang quarantine bilang hakbangin sa banta ng Omicron variant.
Ayon kay OCTA Research fellow Guido David, bagama’t hindi pa natitiyak ang posibleng pagpasok ng naturang virus sa bansa ay mas mainam na maagap ang pamahalaan upang makaiwas sa bagong variant.
Sa ngayon ay may travel ban ang Pilipinas sa 14 bansa dahil sa banta ng Omicron variant, kabilang na ang South Africa na sinasabing pinagmulan ng virus.
“Naiintindihan natin ang pangamba ng mga kababayan natin kasi ngayon ang ganda na ng kalagayan ng Pilipinas, ito na ang pinakamaganda since June pa last year nung nagsisimula pa lang ‘yung first surge natin,” sabi pa ni David.
Bagama’t patuloy anya ang pagbaba ng kaso ng COVID-19 sa bansa kabilang ang positivity rate, sa gitna ng paglawak ng pagbabakuna pero nababahala si David dahil maraming mag-uuwiang OFW mula sa ibang bansa.
“Kung ’di natin magagawa ang travel ban, baka pwedeng mas mahigpit na lang ang quarantine natin especially sa mga unvaccinated. Dapat talaga buo ‘yung 10 to 14 days pag unvaccinated,” dagdag ni David.
Sa ngayon ay may 38 bansa ang may kaso ng Omicron.
- Latest
