Pagmamahal sa bayan ni Bonifacio, gayahin - Mayor Isko
MANILA, Philippines — Hinikayat kahapon ni Manila City Mayor Isko Moreno ang publiko na gayahin ang pagmamahal sa bayan ng bayaning si Andres Bonifacio sa kabila ng pagdagsa ng mga dayuhan sa bansa.
Sa kaniyang talumpati sa ika-158 anibersaryo ng kapanganakan ni Bonifacio kahapon, iginiit ni Moreno na pag-aaari ng mga Pilipino ang Pilipinas kahit na tinatanggap ang mga dayuhan ngayon na manatili at maglagak ng negosyo sa bansa.
“Mahalin natin ang ating bansa. Walang magmamahal dito ng tunay, ng lubos, kung hindi tayo ring mga kapwa Filipino. Hindi po sila ang may-ari ng bansa, tayong mga Filipino,” ayon kay Moreno.
Sinabi ni Moreno na ang pagiging makabayan ni Bonifacio ang naging daan para mamulat ang isipan at puso ng mga Filipino at nagresulta kung nasaan na ang bansa ngayon na malaya sa pananakop ng mga dayuhan.
Sa kasalukuyang panahon, kailangan umano na magkaisa ngayon ang mga Pilipino dahil sa iisang dugo lamang ang nananalaytay sa atin.
“Wag tayong mag-away-away. Maaari tayong magdiskursyo, kani-kaniyang idea, kanya-kanyang opinion, but at the end of the day, we must come together as one nation. Filipino ang umaagos na dugo sa bawat ugat natin, wala ng iba kaya ipamahagi niyo, ikalat niyo ang pagmamahal sa ating kapwa, ang pagmamahal sa ating bansa,” paliwanag ni Moreno.
Iginiit niya sa taumbayan na hindi dapat kalimutan ang nangyari sa nakaraan at dapat may makuhang aral ukol dito upang hindi na maulit pa ang mga kamaliang naganap noon.
Pinurin rin niya ang mga medical frontliners, na tinukoy niya na makabagong mga bayani, dahil sa kanilang sakripisyo ngayong pandemya.
- Latest
