PSL Swim Series tuloy sa DPS

MANILA, Philippines — Hindi mapipigilan ng anumang bagyo ang pagdaraos ng Philippine Swimming League (PSL) Rebuilding Champions Class ABC and Novice Meet Swim Series Leg 2 ngayong araw sa Diliman Preparatory School swimming pool sa Quezon City.

Nais ng PSL na maipagpatuloy ang grassroots development program nito kaya’t patuloy ang asosasyon sa pagdaraos ng mga kumpetisyon na isa sa mga daan para makatuklas ng mga bagong talento.

“We want to discover new talents and develop them to become future members of the national team. It’s (competition) a good venue to showcase their talents and skills,” ani PSL President Alex Papa.

Bibigyan ng medalya ang tatlong mangunguna sa bawat age band habang nakaabang naman ang tropeo para sa mga mananalong Most Outstanding Swimmer sa bawat dibisyon.

Ang PSL ay galing sa matagumpay na pagtataguyod ng unang edisyon ng Rebuilding Champions Class ABC and Novice Meet Swim Series.

Ilang swimmers ang nadiskubre ng asosasyon na huhubugin para sa mga susunod na international competitions.

Mahigit 200 tankers mula sa iba’t ibang panig ng bansa ang lalahok sa torneo kabilang na ang pambato ng Manila, Cebu, Iloilo, Capiz, Bacolod, Cavite, Marikina, Bicol, Quezon, Laguna at Pampanga.