4 teams unahan sa 2-0
MANILA, Philippines — Apat na koponan ang nagnanais masikwat ang ikalawang sunod na panalo sa pagpapatuloy ng Shakey’s Super League Preseason Collegiate Championship sa Rizal Memorial Coliseum sa Vito Cruz, Manila.
Una na ang University of Santo Tomas na haharap sa San Sebastian College-Recoletos sa alas-10 ng umaga habang mag-uunahan naman ang University of Perpetual Help System Dalta at University of the East na makuha ang 2-0 sa kanilang pagtatagpo sa alas-12:30 ng tanghali.
Lalarga naman ang salpukan ng Ateneo at Arellano University sa alas-3 habang aariba rin ang Far Eastern University kontra La Salle sa alas-5:30 ng hapon.
Pare-parehong nanaig ang Tigresses, Lady Altas, Lady Warriors at Lady Tamaraws sa kanilang unang laro sa opening day noong Sabado.
Dumaan sa butas ng karayom ang UST bago itakas ang 25-20, 27-29, 15-25, 29-27, 15-10 panalo laban sa Adamson University sa larong inabot ng madaling araw noong Linggo para makuha ang 1-0 sa Pool B.
Inasahang ilalabas muli ng Tigresses ang matatalim na pangil nito upang pigilan ang anumang pagtatangkang gagawin ng Lady Stags kung saan aasahan ng UST si wing spiker Eya Laure.
Wagi naman ang Perpetual Help sa San Beda University (24-26, 25-21, 25-23, 27-25) habang nakalusot din ang UE sa Mapua University (31-33, 25-20, 25-23, 21-25, 15-12).
- Latest