MANILA, Philippines — Iginiit ng Samahang Basketbol ng Pilipinas (SBP) na kailangang irespeto ni Will Navarro ang kontrata nito sa Gilas Pilipinas at NorthPort.
Naglabas ng statement ang SBP matapos pumutok ang balitang hindi ito pinahintulutan si Navarro na makapaglaro sa Samsung Thunders sa Korea Basketball Association (KBA).
Nilinaw ng SBP na hindi nito pinipigilan ang sinuman na maglaro sa ibang bansa.
Ngunit iba ang sitwasyon ni Navarro na may pinirmahang kontrata bilang bahagi ng Gilas Pilipinas at ng NorthPort na siyang pumili sa kanya bilang No. 5 pick sa 2021 PBA Annual Rookie Draft.
“The SBP respects players’ rights to look for greener pastures. But players also need to respect agreements they have entered into with their teams,” ayon sa statement ng SBP.
Sumulat ang KBA sa FIBA para mabigyan ng Letter of Clearance (LOC) si Navarro na makapaglaro sa Samsung Thunders.
Ngunit dahil sa kontrata nito ay hindi binigyan ng clearance ng SBP si Navarro.
“However, Mr. Navarro has an existing contract to: 1) play for the national team, attend activities, practices, social and business functions and 2) with his undeniable agreement, be assigned to only and no other team or ballclub than his PBA drafting team, the North Port Batang Pier,” ayon sa statement ng SBP.
Kinatigan ng FIBA ang desisyon ng SBP.