MANILA, Philippines — Ibinuhos ng Gilas Women ang ngitngit nito sa Lebanon matapos itarak ang 90-68 demolisyon upang masikwat ang tansong medalya sa 2022 FIBA Women’s Under-16 Asian Championship-Division B na ginanap sa Prince Hamza Sports Hall sa Amman, Jordan.
Matapos lumasap ng 65-94 kabiguan sa Samoa sa semifinals, mas naging dominante ang Pinay cagers para masigurong uuwi ito ng Pilipinas na may bitbit na medalya.
Nagtala ng pitong puntos na kalamangan ang Gilas Women sa halfttime ngunit umariba ito ng husto sa third quarter para makuha ang 67-48 bentahe.
Lumobo pa ito sa 32 puntos na kalamangan bago tuluyang isara ng Gilas Women ang laro.
Nanguna sa matikas na ratsada ng Gilas Women sina Gabby Ramos at Kristal Yumul na parehong humataw ng 20 puntos habang naglista naman si Naomi Panganiban ng 16 puntos at siyam na rebounds.
Sa kabilang banda, nagtala si Angelina Bado ng 19 points at limang boards habang kumana si Nour Labban ng 12 markers para sa Lebanon na nagtapos sa ikaapat na puwesto.
Bigo ang Gilas Women na makapasok sa finals matapos yumuko sa Samoa sa semis.
Tanging ang champion team lamang ang papasok sa Division A.
Dahil dito, mananatili ang Gilas Women sa Division B sa susunod na edisyon ng torneo.