MANILA, Philippines — Kapag kumamada si import Justin Brownlee ay tiyak na ang panalo ng mga Gin Kings.
Naghulog si Brownlee ng 47 points para akayin ang nagdedepensang Barangay Ginebra sa 112-93 pagsibak sa NLEX sa Game Four papasok sa PBA Governors’ Cup Finals kahapon sa Smart Araneta Coliseum.
Isinara ng Gin Kings ang kanilang best-of-five semis duel ng Road Warriors sa 3-1 para umusad sa best-of-seven championship series.
Sa ikalawang laro, pinuwersa ng Magnolia ang Meralco sa deciding Game Five matapos angkinin ang mahalagang 94-73 panalo sa Game Four.
Nagtala si import Mike Harris ng 34 points at 18 rebounds para itabla ang Hotshots sa 2-2 sa kanilang semis showdown ng Bolts.
Nakatakda ang Game Five bukas sa Big Dome.
Ito naman ang ikaapat na Finals appearance ng Ginebra sa huling limang PBA Governors’ Cup.
“What a phenomenal, phenomenal performance that was by Justin. I’m amazed by it,” pagpuri ni two-time PBA Grand Slam champion coach Tim Cone sa kanilang resident import.
Umiskor ang 33-anyos na si Brownlee ng 18 points sa second quarter at 11 markers sa third period para ibigay sa Ginebra ang 13-point lead, 84-71.
Mula dito ay hindi na nakapaghamon ang NLEX.
Nagdagdag si veteran Jeff Chan ng 20 markers para sa Gin Kings at may 14, 12 at 10 markers sina LA Tenorio, Nards Pinto at Christian Standhardinger, ayon sa pagkakasunod.
Binanderahan ni import Cameron Clark ang Road Warriors sa kanyang 34 points at 12 rebounds.