MANILA, Philippines — Wala pang linaw kung makalalaro si Gilas Pilipinas standout Kai Sotto sa first window ng 2023 FIBA World Cup Qualifiers na idaraos sa Pebrero sa Pilipinas.
Kasalukuyang nasa Australia si Sotto kasama ang Adelaide 36ers sa kampanya nito sa National Basketball League (NBL).
At ayon kay 36ers head coach CJ Bruton, hindi pa napag-uusapan ng team management ang paglalaro ng 7-foot-3 sa FIBA World Cup Qualifiers.
“That’s something I haven’t discussed yet, and that’s something probably over my head at this point in time,” ani Bruton sa online press conference na inorganisa ng Tap Sports.
Nilinaw ni Bruton na nasa kamay na ng Adelaide management ang pagdedesisyon sa usapin ng paglalaro ni Sotto sa Gilas Pilipinas sa naturang torneo.
“That’s something that I’ll need to take up the chain, and that’s a question that needs to be asked to someone higher than me,” ani Bruton.
Nakatakdang maglaro ang Gilas Pilipinas sa FIBA World Cup Qualifiers kung saan makakalaban ng tropa ang South Korea, New Zealand at India.
Sa ngayon, dalawang beses nang hindi nakalaro si Sotto sa laban ng Adelaide sa NBL dahil nagpapagaling pa ito sa kanyang knee injury.
“The goal for me every day is to be 0.0001-percent better every single day, trying to make the most out of every day to get better, and stronger,” ani Sotto.
Ginagawa ni Sotto ang lahat upang mas lalong mapaganda ang kanyang kundisyon at laro upang makatulong sa anumang team na kasama nito — ang Adelaide man o ang Gilas Pilipinas.
“This year, I’m just really focused on developing, and helping my team win every time I step on the court. I know when I’m doing that, I’m also preparing for 2023,” ani Sotto.