MANILA, Philippines — Kung medyas ang agaw-atensiyon kay pole vaulter EJ Obiena, pamaypay naman ang pumukaw ng atensiyon sa panig ni golfer Bianca Pagdanganan sa kampanya nito sa Tokyo Olympics.
Mainit ang panahon ngayon sa Tokyo kung saan ilang caddies na ang bumagsak dahil sa tindi ng init.
Kabilang dito ang caddie ni Pagdanganan na si Carito Villaroman at ang caddie ni Yuka Saso na si Lionel Matichuck.
Kaya naman kani-kanyang paraan ang mga players para maibsan ang init sa Kasimugaseki Golf Club sa Saitama.
At isa si Pagdanganan sa mga nakakuha ng atensiyon dahil sa kanyang dalang pamaypay na may bandila ng Pilipinas na nakapinta rito.
Kalakip nito ang ice pack para magbigay ng pandandaliang ginhawa.
“Mainit talaga dito,” ani Pagdanganan.
Hindi naman hinahayaan ni Pagdanganan na makaapekto sa kanyang performance ang init ng panahon.
Nauna nang pinag-usapan sa social media ang medyas ni Obiena na may disenyong SpongeBob sa laban nito sa men’s pole vault competition.
Ginagawa ito ni Obiena upang paalalahanan ang kanyang sarili na mag-enjoy lamang sa bawat kumpetisyong nilalahukan nito.