MANILA, Philippines — Sa kanilang preseason training camp ay sinabihan ni TNT Tropang Giga coach Chot Reyes si power forward Troy Rosario na huwag gayahin ang retirado nang si Ranidel de Ocampo.
Mas gusto ni Reyes na ipakita ni Rosario ang kanyang tunay na personalidad sa loob ng court.
“Simple lang. I just told Troy in our team building, preseason training camp, sinabi ko kay Troy, ‘I don’t want you to be the next Ranidel De Ocampo. I want you to be the first Troy Rosario. Show me who Troy Rosario is.”
Sa 84-80 panalo ng Tropang Giga (3-0) sa Phoenix (1-4) ay humakot ang 6-foot-7 na tubong Mandaluyong City ng 15 points, 8 rebounds at 1 assist para sa kanilang ikatlong sunod na ratsada.
Sa nasabing tatlong panalo ng TNT ay kumolekta ang 29-anyos na si Rosario, produkto ng National University, ng mga averages na 14.0 points at 10.7 rebounds.
“I think that took a lot of weight off his shoulders,” ani Reyes kay Rosario. “Sabi ko maglaro ka lang. I don’t want you to be Ranidel. I need you to be Troy. I need the best Troy Rosario.”
Ang 39-anyos na si De Ocampo, isang six-time PBA champion at two-time Finals Most Valuable Player, ay nagretiro noong Abril ng nakaraang taon.
Kinuha siya ng Tropang Giga bilang assistant coach matapos ang dalawang buwan.