ROS lusot sa NLEX

Alaska tinambakan ang Blackwater

MANILA, Philippines — Dahil sa sobrang dikit ng laban ay walang koponan ang nakapagtala ng double-digit lead sa kabuuan ng laro.

Kumamada si guard Rey Nambatac ng 19 points habang may 17 markers si Beau Belga para tulu­ngan ang Rain or Shine na makatakas sa NLEX, 83-82, sa pagsisi­mula ng 2021 PBA Philippine Cup kahapon sa Ynares Sports Arena sa Pasig City.

“Thank God for this victory. Great effort from both teams,” ani coach Chris Gavina sa Elasto Painters na nakahugot ng 12 points kay Javee Mocon at 10 markers kay Jewel Ponferrada.

Binanderahan ni Kiefer Ravena ang Road Warriors sa kanyang 23 points, 7 assists, 4 rebounds at 3 assists.

Ang semi hook shot ni Belga ang nagbigay sa Rain or Shine ng 83-79 abante sa huling 56.3 segundo habang nagsalpak si Ravena ng triples para sa 82-83 agwat ng NLEX sa nalalabing 19.1 segundo.

Nagkaroon ng turnover ang Elasto Painters, ngunit naimintis ni Road Warriors defender Anthony Semerad ang kanyang jumper sa pagtunog ng final buzzer.

Sa unang laro, kaagad nagparamdam ng kanilang puwersa ang Alaska matapos bugbugin ang Blackwater, 103-77.

Humugot si guard Mike DiGregorio ng 17 sa kanyang 20 points sa second half kung saan itinayo ng Aces ang 65-48 bentahe na hindi na naputol ng Bossing.

Nagdagdag si big man Yousef Taha ng 16 points, 7 rebounds at 3 assists at tumipa si forward Abu Tratter ng 13 markers, 6 boards at 2 blocks.

“My challenge to the guys is really just to share the ball on offense and to defend the best way we can,” sabi ni Alaska coach Jeff Cariaso.

Pinamunuan ni Simon Enciso ang Blackwater sa kanyang 23 points.