ORLANDO, Philippines — Kagaya ng defending champions Los Angeles Lakers, kabiguan din ang nalasap ng 2020 runner-up Miami Heat sa kanilang season opener.
Umiskor si Evan Fournier ng siyam sa kanyang game-high-tying 25 points sa fourth quarter para akayin ang host Magic sa 113-107 paggiba sa Heat kahapon.
Nagdagdag si Orlando forward Aaron Gordon ng 20 points, ang 11 rito ay kanyang ginawa sa fourth period habang may 19 at 15 markers sina Terrence Ross at Nikola Vucevic, ayon sa pagkakasunod.
Pinamunuan ni center Bam Adebayo ang Miami sa kanyang 25 points at 11 rebounds.
Nakahugot din ang Heat ng 20 points mula kay veteran guard Goran Dragic at 14 markers naman kay Duncan Robinson..
Sa Cleveland, tumipa si Collin Sexton ng 27 points at may 22 markers si Darius Garland para tulungan ang host Cavaliers sa 121-114 pagpapatumba sa Charlotte Hornets
Humakot si big man Andre Drummond ng 14 points at 14 rebounds para sa Cleveland.
Samantala, pinagmulta ng NBA si Houston Rockets star James Harden ng $50,000 dahil sa kanyang paglabag sa COVID-19 protocols ng liga matapos makita sa isang video na nakikipagsaya sa isang Christmas party na walang suot na face mask at face shield.
Ipinagpaliban ng NBA ang season-opener ng Rockets kontra sa Oklahoma City Thunder.
“The National Basketball Association game scheduled for tonight between the Oklahoma City Thunder and the Houston Rockets at Toyota Center has been postponed in accordance with the league’s Health and Safety Protocols,” ang statement ng NBA.