World title fight ni Magramo ipinagpaliban
MANILA, Philippines — Sa ikalimang pagkakataon, kinansela ang bakbakan nina Pinoy sensation Giemel Magramo at Japanese fighter Julio Nakatani para sa bakanteng World Boxing Organization flyweight crown.
Nakatakda sana ang salpukan nina Magramo at Nakatani sa Agosto 21 sa Korakuen Hall sa Tokyo, Japan.
Subalit ipinagpaliban na naman ito ng mga organizers matapos muling lumobo ang bilang ng mga tinatamaan ng coronavirus disease (COVID-19) sa Japan.
Dahil sa paglala ng sitwasyon, mas mahigpit ang patakarang ipinatutupad ng Japan partikular na sa mga papasok na foreigners sa kanilang bansa.
Orihinal na naka-schedule ang Magramo-Nakatani noong Abril 14 na nakansela at inilipat noong Hunyo 6.
Muli itong ipinagpaliban at itinakda sa Hulyo 22 na naging Agosto 1 hanggang sa maging Agosto 21 — lahat dahil sa coronavirus.
Wala namang magawa si Magramo kundi ang sumunod sa mga ipinatutupad ng organizers at maghintay kung kailan itutuloy ang laban.
Kasalukuyang ranked No. 1 ang 25-anyos na Pinoy pug kung saan hawak nito ang 24-1 baraha tampok ang 20 knockouts.
Galing ito sa pitong sunud-sunod na KO wins.
Sa kabilang banda, armado si Nakatani ng malinis na 20-2 rekord kabilang ang 15 knockouts.
- Latest