MANILA, Philippines — Kung magdaraos man ang Philippine Sports Commission ng kanilang mga sports events ngayong taon ay ikukunsidera muna nila ang kaligtasan ng lahat dahil sa banta ng COVID-19.
Ayon kay PSC Executive Director Atty. Guillermo Iroy, nasa indefinite suspension pa rin ang pagsasagawa nila ng Batang Pinoy, Philippine National Games, nilalahukan ng mga miyembro ng national team at Children’s Games for Peace.
“Indefinite suspension pa rin, pero tuloy pa rin ang planning and preparation not only for BP (Batang Pinoy) ang PNG but for other programs and event as well,” wika kahapon ni Iroy.
Kinansela rin ng sports commission ang Philippine Sports Summit na nakatakda sa Pebrero 27-29 sa Philippine International Convention Center.
Ilang qualifying tournaments sa China para sa 2020 Olympic Games sa Tokyo, Japan, nakatakda sa Hulyo 24 hanggang Agosto 9, ang nauna nang inilipat sa ibang bansa bunga ng banta ng COVID-19.