23 tankers ilalaban ng SLP-Finis sa Japan

MANILA, Philippines — Ipaparada ng Swim League Philippines-Finis ang 23 matitikas na tankers sa 2020 Age Group Championship Swim Meet na idaraos sa Marso 7-8 sa St. Mary’s International School swimming pool sa Tokyo, Japan.

Mangunguna sa kampanya ng Pinoy tankers sina Philippine national junior record holder Micaela Jasmine Mojdeh at Marcus Johannes De Kam ng Quezon Killerwhale na magtatangkang humakot ng gintong medalya sa kani-kanilang dibisyon.

Walong events ang lalahukan ng Palarong Pambansa multi-gold medallist na si Mojdeh sa girls’ 13-14 year tampok ang anim na individual events at dalawang relays (200m medley relay at 400m freestyle relay).

Mapapalaban ng husto si Mojdeh dahil makakaharap nito ang mas matatanda sa 400m freestyle, 200m Individual Medley, 400m Individual Medley, 200m freestyle, 100m butterfly at 200m butterfly.

Sasalang naman si De Kam sa boys’ 13-14 400m freestyle, 100m butterfly, 100m freestyle, 50m butterfly, 50m freestyle at 200m freestyle habang pamumunuan nito ang relay team sa 200m medley relay at 400m freestyle relay.

“We formed a strong team as we aim to win the overall championship crown this time. These are the best swimmers in the group and we’re hoping to have a fruitful campaign,” wika ni SLP-Finis team manager Joan Mojdeh.

Magpapakitang-gilas din sina Julia Basa sa girls’ 11-12 50m backstroke, 200m IM, 100m IM, 200m freestyle, 100m butterfly at 100m backstroke; Behrouz Mojdeh sa boys’ 8-under 25m butterfly, 50m freestyle, 50m butterfly at 25m freestyle; at Shaenna Marie Andal sa girls’ 13-14 200m breaststroke, 200m IM, 100m breaststroke, 100m butterfly, 400m IM at 200m backstroke.

Kasama rin sa koponan sina Christ Jade Andal (15-18), Jacob Arabes (15-18), Yohan Mikhail Cabana (13-14), Peter Cyrus Dean (12-13), Jordan Lobos (15-18), Lance Lotino (15-18), Jhad Mattheus Macatangay (15-18), Mervien Jules Mirandilla (15-18), John Neil Paderes (15-18), Hugh Alberto Parto (9-10), Hugh Antonio Parto (13-14), Alexander Radovan (15-18), Ivan Radovan (13-14) at Zahjeed Sarmiento (11-12) sa boys’ division.

Aariba naman sa girls’ class sina Judith Morrison-Lonie (15-18), Danae Sarmiento (13-14), Althea Gem Villapena (15-18) at Althea Janine Virrey (13-14).