4 teams unahang dumikit sa Finals
MANILA, Philippines — Sasambulat ngayong araw ang best-of-three semifinals tampok ang apat na koponang mag-uunahang makuha ang 1-0 bentahe sa 2019 Philippine Superliga Grand Prix sa The Arena sa San Juan City.
Masisilayan ang bakbakan ng F2 Logistics at PLDT Home Fibr sa alas-4:15 ng hapon habang aariba naman ang nagdedepensang Petron kontra sa Cignal sa alas-7 ng gabi.
Namamayagpag ang Blaze Spikers na nakasakay sa 15-game winning streak kabilang ang straight-set win sa Sta. Lucia Realty sa quarterfinals.
Matikas ang laro ng Petron sa pangunguna nina American imports Stephanie Niemer at Katherine Bell ngunit pinuri rin ni Petron coach Shaq Delos Santos ang matikas na inilalaro ng local players para suportahan ang kanilang reinforcements.
Partikular na gumagawa para sa Blaze Spikers sina Mika Reyes, Aiza Maizo-Pontillas, Frances Molina, Denden Lazaro, Rhea Dimaculangan at Remy Palma na malaki ang kontribusyon para sa tropa.
Mapapalaban ang Blaze Spikers dahil desidido ang HD Spikers na madungisan ang kanilang rekord.
Pinataob ng Cignal sa quarterfinals ang United VC na nagdala pa ng bagong import sa ngalan ni Thai superstar Sutadta Chuewulim.
- Latest
