Laro Ngayon(The Arena, San Juan City)
4 p.m. Ateneo vs Iriga
6 p.m. Petro Gazz vs Adamson
MANILA, Philippines — Makabalik sa porma ang tatangkain ng Ateneo de Manila University sa pakikipagtipan sa Iriga-Navy sa Premier Volleyball League Season 2 Open Conference sa The Arena sa San Juan City.
Magtutuos ang Lady Eagles at Lady Oragons ngayong alas-4 ng hapon at hangad makabangon mula sa 25-27, 19-25, 11-25 kabiguan sa BanKo Perlas Spikers dahilan para mahulog sila sa No. 4.
Nangunguna ang BanKo Perlas na may 5-0 baraha, habang magkasalo sa ikalawa ang three-time PVL champion Pocari-Air Force (3-1) at reigning Reinforced Conference titlist Creamline (3-1).
Maganda ang ratsada ng Ateneo (2-1) sa kanilang huling laro dahil nakaatake rin nang husto sina Kat Tolentino, Maddie Madayag at Bea De Leon laban sa BanKo Perlas.
Subalit lumabas ang pagiging bagito ng Lady Eagles nang hindi masabayan ang intensidad ng mas beteranong Perlas Spikers na sinabayan pa ng ilang krusyal na attacking errors at mis-reception.
“Each player has a big role. We need to capitalize on our strengths. My strength is spiking but I wouldn’t be able to do that without the help of my teammates especially our setter and libero. Their role is just as important as mine,” ani Tolentino na top scorer ng Lady Eagles.
Nakalugmok sa ilalim ang Lady Oragons matapos lumasap ng limang sunod na kabiguan.
Maghaharap ang Petro Gazz at Adamson University sa alas-6 ng gabi.