MANILA, Philippines — Mapapalaban ng husto si reigning IBO World Bantamweight champion Michael “Gloves of Fire” Dasmarinas sa pagsagupa nito kay undefeated Manyo “Black Flash” Plange ng Ghana sa Setyembre 29 sa Marina Bay Sands sa Singapore.
Hawak ng 26-anyos na si Dasmarinas ang 28-2 rekord at kasalukuyang numero uno sa IBO rankings habang ikalima ito sa World Boxing Council at ikaanim naman sa International Boxing Federation.
“Dasmarinas just keeps getting better, and possesses that one punch knockout power, all his future opponents now fear. The name “Gloves on Fire” has more than one meaning, and he will surely set the bantamweight division on fire with his power and determination,” ani Scott Farrell ng Ringstar, ang humahawak sa mga laban ni Dasmarinas.
Galing si Dasmarinas sa impresibong panalo noong Abril kung saan itinarak nito ang fourth-round knockout win laban kay Karim Guerfi ng France sa kanilang 12-round bout.
Ngunit masusubukan ang tikas ni Dasmarinas dahil makakatipan nito si Plange na may malinis na 17-0 rekord.
Layunin ng Ringstar na makatuklas ng mahuhusay na atleta na huhubugin upang maging world champion.
At isa si Dasmarinas sa masuwerteng nadiskubre ng Ringstar kasama sina Singaporean IBO Intercontinental Featherweight champion Muhamad “The Chosen Wan” Ridhwan at Malaysian IBO Oceania Welterweight champion Keng “The Mean Machine” Fai.