Baguio City dinomina uli ang Batang Pinoy
BAGUIO CITY , Philippines — Bagama’t may nangyaring trahedya sa kanilang probinsya, hindi ito naging dahilan para panghinaan ng loob ang mga atleta ng host province.
Matagumpay na naidepensa ng Baguio City ang kanilang overall championship matapos humakot ng 46 gold, 46 silver at 57 bronze medals sa pagtatapos ng 2018 Batang Pinoy National Finals kahapon dito sa Baguio Athletic Bowl.
“I-congratulate lahat ng mga nag-participate, of course special congratulations sa aming mga anak or aming mga athletes who performed well in their respective events,” sabi ni Baguio City Mayor Mauricio Domogan sa panayam ng PSNgayon Sports.
Idinagdag pa ng Alkalde na may inihanda silang cash incentives para sa kanilang mga atletang pumitas ng gold, silver at bronze medals.
Karamihan sa gintong medalyang kinolekta ng mga Highlanders ay mula sa mga martial arts events na wushu (13), taekwondo (10), wrestling (8) at judo (8), samantalang nakahugot din sila sa archery (2), athletics (2) at triathlon (1).
Nag-uwi ang Baguio City ng 55 gold, 41 silver at 41 bronze medals para angkinin ang overall crown sa huling Batang Pinoy National Finals noong 2016 sa Tagum City, Davao Del Norte.
Nakasama naman sa Top 10 ang Cebu City na nagposte ng 21 ginto, 25 pilak at 28 tansong medalya kasunod ang Quezon City (21-12-16), Laguna Province (20-8-20), Cebu Province (16-9-15), Dasmariñas City (14-7-4), Lucena City (13-6-2), Zamboanga City (12-21-14), Pangasinan Province (12-15-14) at Taguig City (10-6-9).
Magbibigay ang Philippine Sports Commission ng cash incentive na P3 milyon sa Baguio City bilang overall champions habang tatanggap ang Cebu City, Quezon City, Laguna Province at Cebu Province ng P2.5 milyon, P2 milyon, P1.5 milyon at P1 milyon, ayon sa pagkakasunod.
“We hope that more than the medals, more than the winning, it is the experience of being a Batang Pinoy athlete which will leave a lasting impact on your life,” ani PSC chairman William 'Butch' Ramirez sa mga atleta.
- Latest
