JAKARTA — Isang bronze medal ang muling nakuha ng Pilipinas mula sa wushu.
Ito ay matapos matalo si Divine Wally sa kanyang semifinals match laban kay Mansoryan Samiroumi Elaheh ng Iran sa women’s -52kg. sanda kagabi sa 18th Asian Games dito sa Jakarta International Expo.
Sa likod ng pagbubunyi ng Pilipinas sa gintong medalyang hatid ni weightlifter Hidilyn Diaz kamakalawa ng gabi, nakasiguro ng bronze si Wally matapos ang 2-0 panalo laban sa local bet na si Selviah Pertiwi, 2-0 sa quarterfinals.
Ang medalya ng 23-gulang na si Wally ang ika-lima ng Pinas at dagdag sa gold ni Diaz at apat na bronze ng Pinoy athletes - dalawa sa men’s at women’s poomsae teams, isa mula sa kapwa niya wushu artists na si Agatha Wong at isa mula kay taekwondo jin Pauline Lopez.
Naunang tinalo ni Wally, gold medalists noong 2015 World championships, 2016 Asian championships at sa 2017 SEA Games si Japanese Mimi Yoysaykham, 2-0 sa round-of-8.
Umabot naman ang kanyang kasamahang si Jean Claude Saclag sa quarterfinals ngunit sinibak ni Surya Bhanu Barthap ng India, 0-2 matapos ang 2-0 panalo kay Iat San Mio ng Macau sa round-of-16.
Sa quarterfinals lang din umabot ang taekwondo jin na si Samuel Thomas Morison. At nasibak agad sa kanyang round-of-16 match si Francis Agojo sa taekwondo competition sa Jakarta Convention Center.
Sa softball, naitala ng RP Blu Girls ang ikaapat na panalo sa 5-laro matapos ang 4-0 win kontra sa Indonesia ngunit may laban pa sila kontra sa Chinese Taipei kagabi.
Kailangang manalo ng mga Pinay sa Taipei at mag-top two para makasiguro ng bronze medal.
Sa semis round, maghaharap ang No. 1 at No. 2 teams gayundin ang No. 3 at No. 4. teams kung saan ang matatalo sa No. 1 at No. 2 ay haharap sa mananalo sa No. 3 at No. 4 para sa bronze medal match. Ang mananalo naman sa No. 3 at 4 ay haharap sa winner na labanan ng top two teams para sa gold medal match.
Sa volleyball, tangka ng Phl Lady Spikers na makabangon sa straight sets loss kontra sa Thailand at Japan sa pagharap sa Hong Kong ngayong alas-12:30 ng tanghali (1:30 Manila Time) sa GBK Indoor court.