Laro Ngayon(Ynares Pasig)
1pm Batangas vs AMA
3pm CEU vs Marinero
MANILA, Philippines — Paglalabanan ng Centro Escolar University at Marinerong Pilipino ang solong ikatlong puwesto sa pagpapatuloy ng 2018 PBA D-League Foundation Cup sa Ynares Sports Arena sa Pasig City.
Magkukrus ang landas ng Scorpions at Skippers sa alas-3 ng hapon.
Magkasalo sa No. 3 spot ang CEU at Marinero tangan ang parehong 2-2 baraha.
Nangunguna ang Go For Gold na may imakuladang 4-0 baraha kabuntot sa ikalawa ang Che’Lu na may 3-1 kartada.
Inilabas ng Scorpions ang kamandag nito para patumbahin ang AMA Online Education, 96-85 sa kanilang huling laro.
Bida sa naturang panalo si Judel Fuentes na nagpasabog ng 25 puntos.
Subalit inihanda ni Scorpions head coach Derrick Pumaren ang kanyang bataan dahil alam nitong hindi madaling kalaban ang Skippers.
“Marinerong Pilipino is a bigger team, so hopefully, we could offset their height and experience. We just have to come out and clamp down on them,” wika ni Pumaren.
Determinado ang Skippers na muling makaahon matapos lumubog sa huling laro sa kamay ng Scratchers, 83-88.