MANILA, Philippines — Tuluyan nang inangkin ng Petron ang korona matapos talunin ang F2 Logistics, 25-19, 25-20, 22-25, 25-18, sa deciding Game Three ng kanilang Philippine Super Liga Grand Prix championship series kagabi sa Araneta Coliseum.
Bumandera sina American imports Kath Bell at Lindsay Stalzer para sa pagtitiklop ng Blaze Spikers sa kanilang best-of-three titular showdown ng Cargo Movers sa 2-1.
“This is such a sweet victory. Finally, we’re back on top,” sabi ni coach Shaq Delos Santos.
Ito ang pangalawang Grand Prix title ng Petron at ikaapat sa kabuuan sa commercial league.
Humataw si Bell ng 25 kills at 3 blocks para sa kanyang 28 points, habang nagtala si Stalzer ng 20 kills, 3 aces at 1 block para tumapos na may 24 points.
Muntik nang masayang ang 10-point lead ng Blaze Spikers sa fourth set matapos makalapit ang Cargo Movers sa 14-17 agwat.
Muli namang nagbida sina Bell at Stalzer, hinirang na Most Valuable Player, para tuluyan nang ibigay sa Petron ang panalo kontra sa F2 Logistics.
Nauna nang inangkin ng Blaze Spikers ang 2-0 bentahe matapos bumandera sa first at second set.
Kumamada naman si Ara Galang sa third set para ibangon ang Cargo Movers mula sa six-point deficit at ilista ang 25-22 panalo.
Nauwi sa rubber match ang serye matapos iselyo ng F2 Logistics ang 25-17, 25-22, 25-19 demolisyon sa Game Two noong Huwebes.