MANILA, Philippines — Napaamo ng National University ang University of Santo Tomas sa bisa ng 25-19, 14-25, 25-19, 28-26 panalo upang manatiling malinis ang kanilang rekord sa UAAP Season 80 women’s volleyball tournament kahapon sa The Arena sa San Juan City.
Inilatag ni Jasmine Nabor ang kanyang impresibong playmaking decisions nang magtala ng 32 excellent sets kasama ang apat na puntos para pamunuan ang Lady Bulldogs na maikonekta ang pang-limang sunod na panalo at manatiling nakakapit sa unahan ng standings.
Nagsilbing matibay na armas ng NU si team captain Jaja Santiago na nagpakawala ng matatalim na atake kasama ang ilang krusyal na aces sa huling bahagi ng laban, habang maganda ang suportang ibinigay nina Risa Sato, Aiko Urdas at Audrey Paran.
Dalawang panalo na lamang ang kailangan ng Lady Bulldogs para mawalis ang first round ng eliminasyon.
Gumulong ang Tigresses sa 2-3 marka sa kabila ng magandang inilaro nina wing spikers Sisi Rondina at Carla Sandoval.
Sa unang laro, tinalo ng Ateneo de Manila University ang University of the Philippines, 25-20, 25-22, 28-26, para sa kanilang ikaapat na sunod na panalo.
Nangibabaw si opposite hitter Jules Samonte na bumanat ng 15 puntos para dalhin ang Lady Eagles sa 4-2 baraha at saluhan ang nagdedepensang De La Salle Lady Spikers (4-2) sa ikalawang puwesto.
Sa men’s division, wagi ang reigning champion Ateneo sa UP, 25-21, 23-25, 27-25, 25-21, para kapitan nang husto ang No. 2 spot bitbit ang 5-1 marka.
Nanaig din ang NU sa UST, 18-25, 25-21, 25-18, 25-18.